Meer oor ons

Heuningland is ‘n salige stukkie aarde tussen Beaufort-Wes en Fraserburg op die Oukloof pad.

Ons grens aan die Suid-Westelike kant van die Karoo Nasionale Park. Vir jare droom ons om ‘n selfonderhoudende leefstyl hier te vestig. Na baie ander avonture het die tyd aangebreek om van die gewone padkaarte af te klim en oor te klim op die hartkaart van die Karoo.

Die naam Heuningland is gekies vir dit wat “heuning” vir ons simboliseer:

100% Natuurlik

Oorspronklik

Genesing

Belofte

Eenvoud

Produktiwiteit

100% Natural

Original

Healing

Promise

Simplicity

Productivity

Heuningland word bewaak en gekoester deur die berge, en word gevoed deur baie herinneringe, twee sterk boorgate en ‘n groot droom. Die staptoere en perdry ekspedisies sal die eerste tree wees na ons visie om onsself permanent hier te kom vestig.

Die mens kan nie weer teruggaan na die tyd toe miljoene springbokke oor die Karoo vlaktes getrek het nie, maar die aarde hier onthou nog. Die herinneringe van die aarde word hier, in die ysterklippe van die Groot Karoo gebêre. Kom sit op een, en onthou saam met ons.

Oor Douwe Vlok

– Jou Toergids

Douwe Vlok is ‘n boorling van Beaufort-Wes in die Groot Karoo en het van kleins af baie tyd in die veld spandeer. Sy interessante agtergrond met meer as 25 jaar se bewese ervaring as toergids sluit onder andere San Parke en die Weskus Nasionale Park in. Hy is ‘n formeel opgeleide toergids (FGASA Level 2) and kan ook toere lei in die groot vyf areas. Douwe het al regoor die wêreld gereis en het 4.5 jaar in Paraguay spandeer waar hy ‘n groot beesplaas bestuur het wat oortrek was met wild, macaws en papegaaie.

Hy was ‘n riviergids op die Oranjerivier, Overlanding, vir 21 dae van Kaapstad tot Namibië tot Botswana en Victoria Valle asook ‘n “jeep-jockey” vir 6-ster oorde en ‘n gids vir die Oystercatcher Trail in Mosselbaai. Douwe en Liezl Vlok het Heuningland Karoo Toere in 2016 begin en fokus onder andere op gespesialiseerde toere in die Karoo.

Douwe se passie en kennis vir die veld is hoogs aansteeklik en besoekers verlaat toere met tonne interessante inligting en herinneringe vir ‘n leeftyd.